Google DeepMind njoftoi një sukses që po konsiderohet historik në zhvillimin e Inteligjencës Artificiale, duke e krahasuar me momentet ikonike kur Deep Blue mposhti Garry Kasparovin në shah në vitin 1997 dhe kur AlphaGo triumfoi ndaj kampionit botëror në Go në vitin 2016.

Versioni më i fundit i modelit, Gemini 2.5 AI, zgjidhi një problem jashtëzakonisht kompleks të botës reale gjatë një konkursi ndërkombëtar programimi të zhvilluar këtë muaj në Azerbajxhan, duke fituar medalje ari dhe duke u bërë modeli i parë i IA që arrin një sukses të tillë.

Detyra kërkonte përllogaritjen e mënyrës më efikase për shpërndarjen e një lëngu në një rrjet të ndërlidhur kanalesh dhe rezervuarësh, duke eksploruar një numër të pafund mundësish. Ndërsa programuesit më të mirë nga Rusia, Kina dhe Japonia nuk ia dolën, Gemini 2.5 e zgjidhi sfidën brenda më pak se gjysmë ore.

Në total, modeli u rendit i dyti mes 139 programuesve më të fortë universitarë në botë, duke performuar sipas Google “po aq mirë sa një nga 20 koduesit më të mirë globalisht”.

“Kjo është një hap gjigant drejt Inteligjencës së Përgjithshme Artificiale (AGI), pasi kërkon arsyetim abstrakt, kreativitet dhe aftësi për të sintetizuar zgjidhje të reja ndaj problemeve të panjohura më parë”, theksoi kompania.

Ky sukses i Gemini 2.5 shënon një moment kyç në garën globale të zhvillimit të IA, duke treguar se modelet moderne po afrohen gjithnjë e më shumë ndaj aftësive të mendimit njerëzor në situata komplekse dhe dinamike.