Dy të rinjtë, të moshës 22 vjeç, që u arrestuan pas vrasjes së pronarit grek dhe mikut të tij shqiptar në një kamping në Finikounda, kanë dhënë dëshmi kontradiktore lidhur me ngjarjen e 5 tetorit.

Sipas burimeve të Protothema.gr, njëri prej të arrestuarve, i vetëdorëzuar së fundmi, pretendon se shoku i tij ka kryer vrasjen, ndërsa ai ka qëndruar jashtë kampingut gjatë incidentit. Pas kësaj deklarate, policia arrestoi edhe të dyshuarin tjetër si autor të krimit.

Megjithatë, 22-vjeçari i dytë mohoi përpara hetuesve çdo përfshirje, duke akuzuar shokun e tij si bashkëpunëtor.

Edhe pse nipi i pronarit grek e identifikoi si autor, i dyshuari mohon motivin dhe lidhjen me viktimat, duke pretenduar se nuk njihte asnjërin prej tyre dhe se nuk kishte arsye për të kryer krimin.

Çështja vazhdon të hetohet nga autoritetet greke, ndërsa kontradiktat në dëshmitë e të rinjve komplikojnë zbardhjen e plotë të ngjarjes.