Ambasada e Greqisë në Shqipëri ka reaguar në lidhje me situatën e zjarreve që kanë përfshirë vendin, duke njoftuar se po e monitoron situatën dhe po kontribuon brenda kapaciteteve të saj për shuarjen e flakëve me mjete ajrore zjarrfikëse.

Në një postim në Facebook, Ambasada shprehu solidaritetin e saj me popullin shqiptar dhe ngushëllimet për pasojat e shkaktuara nga zjarret, të cilat kanë dalë jashtë kontrollit sidomos në zonat e Delvinës dhe Gramshit.

Po ashtu, Italia ka dërguar në Shqipëri 5 helikopterë dhe një avion zjarrfikës Canadair për të mbështetur përpjekjet e shuarjes së flakëve.

“Ambasada e Greqisë në Shqipëri shpreh ngushëllimet e saj të sinqerta vendit mik dhe fqinj, Shqipërisë, dhe monitoron situatën me frontin e gjerë të zjarreve në vend. Në frymën e bashkëpunimit dhe solidaritetit, Greqia, brenda kuadrit të kapaciteteve të saj, kontribuon në përpjekjen për të shuar zjarret me mjete ajrore zjarrfikëse, si në kuadër të Mekanizmit Evropian të Mbrojtjes Civile, ashtu edhe në kontekstin e bashkëpunimit dypalësh. Mendimet tona janë me popullin shqiptar”, thuhet në reagim.