Greqia ka mbyllur përkohësisht hapësirën e saj ajrore pas problemeve serioze të shfaqura në sistemet e radio-ndërlidhjes, të cilat kanë ndikuar drejtpërdrejt në fluturimet nga dhe drejt vendit.

Sipas autoriteteve greke, jashtë funksionit kanë dalë sistemet e komunikimit në Greqinë veriore, duke shkaktuar bllokimin e komunikimit të avionëve që qarkullojnë në hapësirën ajrore të vendit. Për pasojë, asnjë avion nuk mund të ulet apo të ngrihet në mënyrë automatike nga aeroportet greke.

Avionët që ndodheshin në fazën e uljes në momentin e defektit kanë përdorur procedura manuale dhe vizive për zbritjen, ndërsa autoritetet theksojnë se nuk ka pasur rrezik për aksidente. Megjithatë, këto sisteme manuale mund të përdoren vetëm në kushte të favorshme atmosferike dhe me shikueshmëri të mirë.

Të dhënat nga FlyRadar tregojnë se fluturimet që kalonin mbi Greqi janë devijuar, duke ndjekur rrugë alternative mbi Turqi ose Detin Egje, për të vazhduar më pas drejt Ballkanit ose Italisë, me qëllim garantimin e sigurisë së udhëtimeve.

Autoritetet greke po punojnë për rikthimin e plotë të sistemeve të komunikimit dhe normalizimin e trafikut ajror.