Një situatë e rrezikshme është shënuar sot në rrugën që lidh Vlorën me Radhimën, pranë vendit të quajtur Gjurma, pak para tunelit të Ujit të Ftohtë. Në mes të rrugës është hapur një gropë e madhe në asfalt, duke rrezikuar seriozisht qarkullimin e automjeteve.

Dëshmitarët bëjnë me dije se disa drejtues mjetesh janë detyruar të ndalojnë ose të devijojnë rrugën për të shmangur dëmtimet. Aktualisht, zona nuk është e sinjalizuar dhe mungojnë masat mbrojtëse, çka shton rrezikun për aksidente.

Autoritetet lokale janë njoftuar për defektin dhe pritet që në orët në vijim të ndërhyhet për të rrethuar dhe riparuar segmentin e dëmtuar. Drejtuesit e mjeteve këshillohen të lëvizin me kujdes dhe të ulin shpejtësinë në këtë zonë.