Prokuroria e Posaçme kundër Korrupsionit dhe Krimit të Organizuar (SPAK) ka ekzekutuar masën e sigurisë “arrest me burg” për 10 shtetas, pjesë e grupit të dyshuar për trafik ndërkombëtar të lëndëve narkotike, në kuadër të operacionit të koduar “Rikthimi”.
Shtetasit e arrestuar janë: Rexhep Rraja, Përparim Rraja, Gazmir Rraja, Aldo Gjini (alias Aldo Iamandi), Jani Çavo, Islam Sefa (alias Islam Xaka), Agim Nina (alias Lorenc Selmani), Zamir Aliaj (alias Zamir Çoku), Sokol Qaja dhe Marvin Bushati (alias Marvin Kopliku).
SPAK njofton se tre persona të tjerë – Bujar Sefa, Hajdar Sefa dhe Vildan Baroku – janë shpallur në kërkim ndërsa i hetuari Ervis Shuli ndodhet jashtë shtetit. Hetimet kanë zbuluar se grupi trafikonte drogë nga Shqipëria drejt Malit të Zi, Gjermanisë, Turqisë dhe vendeve të Amerikës së Jugut, ndërsa komunikimi midis anëtarëve bëhej përmes aplikacionit të enkriptuar SkyECC.
Gjatë kontrollit të banesave, automjeteve dhe personave të përfshirë, autoritetet sekuestruan:
• 415.000 euro, 7.000 dollarë amerikanë dhe 1.000.000 lekë
• 11 aparate celularë
• 3 automjete luksoze (BMW X5, Range Rover, Volkswagen Golf 6)
• 1 armë zjarri Glock me 9 fishekë
• 1 jelek antiplumb, 1 palë dylbi, 1 orë Rolex dhe dokumente të ndryshme
Hetimet e SPAK dhe strukturave policore, në bashkëpunim me autoritetet europiane, kanë zbardhur rolet e drejtuesve, financuesve dhe pjesëmarrësve të grupit kriminal. Ky operacion ka shërbyer për të parandaluar aktivitet kriminal dhe trafik të konsiderueshëm droge drejt vendeve të Bashkimit Europian.
SPAK dhe Policia e Shtetit vijojnë punën për arrestimin e personave në kërkim dhe për zbardhjen e plotë të skemës së veprimtarisë kriminale.
