Një tjetër oficer policie në Guatemala ndërroi jetë të hënën, një ditë pas një vale sulmesh dhe trazirash që çuan presidentin Bernardo Arevalo të shpallte një gjendje rrethimi kombëtare për 30 ditë. Me këtë vendim, qeveria synon të luftojë bandat e dhunshme që kanë destabilizuar vendin.

Sulmet e koordinuara kanë goditur personelin e policisë në hakmarrje për rifitimin e kontrollit të tre burgjeve një ditë më parë, ku të burgosurit kishin marrë peng dhjetëra roje dhe një psikiatër. Të dielën, tetë oficerë u vranë, ndërsa i nënti, i plagosur gjatë një udhëtimi me motoçikletë, vdiq të hënën në një spital publik.

Ministri i Brendshëm, Marco Antonio Villeda, dënoi sulmet si “frikacake” dhe tha se vdekjet ishin hakmarrje për veprimet e shtetit kundër bandave. Në kuadër të gjendjes së jashtëzakonshme, autoritetet kanë pezulluar të drejtat kushtetuese për tubim dhe demonstratë, dhe lejojnë arrestimet pa urdhër-arreste.

Ministri i Mbrojtjes, Henry Saenz, njoftoi se ushtria do të realizojë patrulla rrugore për të goditur strukturat e krimit të organizuar, ndërsa shefi i policisë, David Custodio, deklaroi se oficerët janë të gatshëm të mbrojnë qytetarët duke përdorur armët e tyre nëse është e nevojshme.

Të hënën u mbyllën shkollat dhe u nisën tre ditë zie kombëtare për të nderuar oficerët e rënë. Funeralet u organizuan me pjesëmarrjen e presidentit Arevalo, ku arkivolet e oficerëve ishin të mbështjellë me flamurin e Guatemales.

Bandat Barrio 18 dhe Mara Salvatrucha, të cilat qeveria e Guatemales dhe SHBA-ja i kanë klasifikuar si organizata terroriste, luftojnë për kontrollin e territorit, duke kryer vrasje, zhvatje dhe trafik droge ndaj qytetarëve dhe tregtarëve të zakonshëm.

Gjendja mbetet kritike, ndërsa autoritetet po përpiqen të rivendosin qetësinë dhe sigurinë kombëtare.