Grupi i hakerave homelandjustice.ru ka nisur të publikojë pasditen e sotme materiale nga e-mail i ambasadave të Shqipërisë në Shkup, Athinë dhe Moskë, duke njoftuar në faqen e tyre se Ministria e Jashtme kishte qenë “zgjedhja e popullit në sondazhe” për t’i bërë publike databazën që e disponojnë pas sulmit kibernetik të ditëve më parë.

Por që prej datës 8 gusht në faqen e këtij grupi hakerash, emri i të cilëve përkthehet “Drejtësi për Atdheun” është publikuar një njoftim, ku thuhet se në datë 10, pra ditën e sotme do të bëhen publike materiale me përmbajtje që nxjerrin në pah skandale të qeverisë shqiptare.

“E mërkurë: Qeveria e Shqipërisë bën gjithçka që korrupsioni i tyre të mos ekspozohet. Së shpejti do të jeni dëshmitarë të surprizave të jashtëzakonshme nga ana jonë…”, thuhet në njoftimin që është shoqëruar me një timetable.

Ndërkohë në faqen zyrtare ku janë publikuar edhe emailet e ministrisë së Jashtme me ambasadat shqiptare, vihet re një kohëmatës i cili tregon se për pak minuta do të fillojë publikimi i të dhënave që hakerat i kanë quajtur “surpriza të jashtëzakonshme”.