Një grup hakerësh që vepron me pseudonimin “Robert”, të lidhur me Iranin, ka deklaruar se ka rrëmbyer 100 gigabajt korrespondencë elektronike nga figurat kyçe të rrethit të ngushtë të Presidentit Donald Trump.

Në një intervistë me agjencinë Reuters, grupi pretendoi se zotëron email-e të ndjeshme të dërguara nga persona si Susie Wiles (shefja e stafit), avokatja Lindsey Halligan, këshilltari Roger Stone, dhe Stormy Daniels, e njohur për përfshirjen në skandalin me ish-presidentin gjatë fushatës presidenciale.

Hakerët deklaruan se mund të shesin materialet, por nuk zbuluan përmbajtjen e tyre dhe as qëllimin përfundimtar të publikimit.

Menjëherë pas publikimit të lajmit, Agjencia Amerikane për Sigurinë Kibernetike dhe të Infrastrukturës (CISA) reagoi në platformën X, duke e cilësuar këtë si një fushatë propagandistike të dizenjuar për të shpifur dhe destabilizuar ish-presidentin dhe stafin e tij.

Ky incident ndodh në një kohë të tensionuar mes SHBA-së dhe Iranit, pas bombardimit nga amerikanët të uzinës së uraniumit në Fordow, në kuadër të përplasjeve me Teheranin dhe Izraelin për programin bërthamor.

Sipas FBI-së, sulmet e tilla nuk janë të reja. Në vitin 2024, një tjetër grup i lidhur me Trupat e Gardës Revolucionare Islamike (IRGC) u përfshi në publikimin e email-eve të administratës Trump, si dhe në dërgimin e mesazheve të pakërkuara tek fushata e Joe Biden.

Hetimet për atë rast çuan në paditjen e tre individëve të lidhur me IRGC, një organizatë që SHBA e ka shpallur terroriste që prej vitit 2019.

Sipas raportit më të fundit të Inteligjencës Kombëtare Amerikane (DNI), kërcënimi kibernetik iranian mbetet një rrezik serioz, me grupe të sponsorizuara nga shteti iranian që vijojnë të shënjestrojnë objektiva strategjikë në SHBA dhe tek aleatët e saj.