Aktori kryesor i serialit të njohur turk “Sulejman i Madhërishëm”, Halit Ergenc, dhe aktorja Meryem Uzerli do të rikthehen së bashku pas 15 vitesh për një film të ri me titull “Imroz’da Bahar”, ku të dy do të luajnë rolet kryesore. Ky projekt shënon ribashkimin e çiftit që fitoi famë ndërkombëtare me serialin historik të transmetuar nga 2011 deri në 2014.

Në serial, Ergenc portretizonte Sulltan Sulejmanin, ndërsa Uzerli luante Hurem Sultan, një nga gratë më me ndikim në pallatin osman. Projekti historik përfshinte edhe aktorë si Okan Yalabık, Nebahat Çehre, Selma Ergec dhe Nur Fettahoglu, dhe u transmetua në shumë vende, duke e bërë serialin një nga më të suksesshmit turk.

Ribashkimi i Ergenc dhe Uzerli u mundësua nga themeluesi i kompanisë producent Sky Films, Emre Oskay, i cili pas disa përpjekjesh arriti t’i bashkojë aktorët në një projekt të përbashkët.

Filmi do të rrëfejë historinë e dy personave që takohen në ishullin Imroz (sot Gokçeada) dhe eksploron idenë e një “pranvere të dytë” në jetë, duke pyetur nëse dashuria mund të rikthehet në një fazë të re të jetës. Xhirimet pritet të fillojnë së shpejti, ndërsa platforma e shfaqjes në Turqi ende nuk është konfirmuar.

Ky projekt do të shënojë bashkëpunimin e parë të Ergenc dhe Uzerli në një film pas serialit historik, që edhe sot vazhdon të tërheqë audiencë ndërkombëtare përmes reprizave dhe platformave të ndryshme.