Romeo Mersini, 29-vjeçari që pak javë më parë shpëtoi një çift të moshuarish nga flakët në Fier, është arrestuar nga policia pas një konflikti me xhaxhain e tij. Sipas raportimeve, debati mes Mersinit dhe xhaxhait të tij për motive të dobëta ka përshkallëzuar, duke çuar në përdorimin e sendeve të forta nga 29-vjeçari.
Në incident është përfshirë dhe vëllai i Romeos, i identifikuar si M. Mersini, 32 vjeç, i cili gjithashtu është arrestuar pasi ka goditur me sende të forta Romeon. Sipas njoftimit të policisë, të dy vëllezërit ndodhen në pranga për shkak të përleshjes së dhunshme.
“Specialistët për Hetimin e Krimeve të Komisariatit të Policisë Fier arrestuan shtetasin R. M., 29 vjeç, banues në Fier, pasi për motive të dobëta ka goditur me sende të forta xhaxhain e tij. Për këtë rast u arrestua edhe shtetasi M. M., 32 vjeç, pasi ka goditur me sende të forta vëllanë e tij, shtetasin R. M.”, njofton policia.
Kujtojmë që pak ditë më parë në një banesë në lagjen “15 Tetori” u përfshi nga flakët ndërsa brenda ishin dhe një çift të moshuarish. Ishte djali i të moshuarve që i vuri flakën shtëpisë me qëllim vrasjen e prindërve të tij.
Gjykata e Rrethit Gjyqësor Fier vendosi “Shtrim të detyruar në spitalin psikiatrik” për 42-vjeçarin Altjon Sulejmanaj, i arrestuar pasi tentoi të vriste prindërit e tij të moshuar, Shaqir dhe Selfixhe Sulejmanaj.
