Autoritetet finlandeze kanë nisur një hetim mbi këputjen e kabllos “C-Lion1” të komunikimit, që lidh Finlandën me Gjermaninë, ndërsa Suedia po heton një incident të ngjashëm që ndodhi një ditë më parë, mes Lituanisë dhe Suedisë. Hetimet e të dyja vendeve janë fokusuar në mundësinë që këto incidente të jenë akte sabotazhi.

Kablli “C-Lion1” u dëmtua të hënën, një ditë pasi një kabllo tjetër në shtratin e Detit Baltik u prish pranë ishujve suedezë të Olandit dhe Gotlandut. Ministri gjerman i Mbrojtjes ka shprehur shqetësim për mundësinë e sabotazhit, por për momentin nuk ka prova konkrete. Byroja Kombëtare e Hetimit në Finlandë ka hapur një hetim penal dhe ka përmendur mundësinë e një veprimi kriminal që ka ndërhyrë rëndë në sistemet e komunikimit.

Përveç hetimeve, autoritetet suedeze kanë nisur një hetim për sabotim të dyshuar dhe po shqyrtojnë rolin e një anijeje që është parë afër zonës së incidentit. Mediat kanë raportuar se një anije me flamur kinez, “Yi Peng 3”, ka qenë në zonën e dëmtimit të kabllove. Sipas informacionit të siguruar nga një faqe interneti që monitoron trafikun detar, anija me gjatësi 225 metra është ndalur në brigjet e Danimarkës, pas incidentit.

Hetimet janë ende në fazën e hershme, dhe autoritetet janë duke analizuar të gjitha informacionet për të përcaktuar shkakun e vërtetë të këputjes së kabllove dhe lidhjen e mundshme me sabotazh.