Sektori i Hetimit të Krimeve të Rënda në Policinë e Tiranës ka nisur hetimet prej tre muajsh në lidhje me pengmarrjen e një 35-vjeçari. Viktima u mbajt peng për të paktën një orë dhe u dhunua nga autorët, të cilët i kërkuan një shumë prej 70 mijë eurosh. Pas lirimit, viktima bëri kallëzim pranë policisë, e cila kreu veprime proaktive dhe arriti në identifikimin e shtatë personave të përfshirë në ngjarjen.

Deri tani, janë ekzekutuar pesë masa sigurie. Aleksandër Osmani dhe Artan Pirraci janë arrestuar, ndërsa Naim Qarri, Sajmir Kolaveri, dhe Adem Metkola janë vendosur në arrest shtëpie. Ende në kërkim janë Tori Xhecuka, alias Hektor Xhecuka, dhe Fredi Keta. Xhecuka, i cili dyshohet se është arratisur drejt Dubait, është gjithashtu në kërkim për llogari të SPAK si i përfshirë në dosjen “Revanshi”. Ai akuzohet për disa vepra të rënda penale, përfshirë tentativë vrasjeje ndaj Durim Bamit dhe Hamza Tërziut, sigurim i kushteve për të kryer vrasje dhe armëmbajtje pa leje.