Tragjedia e vrasjes së studentes shqiptare Ilaria Sula po merr përmasa gjithnjë e më të rënda, teksa autoritetet italiane po zbulojnë detaje të reja që hedhin dritë mbi një rrjet të mundshëm bashkëpunëtorësh të 23-vjeçarit Mark Samson, autori i dyshuar i krimit makabër.

Përveç nënës së tij, Nors Marlapz, e cila tashmë ndodhet nën hetim për bashkëpunim në fshehjen e trupit dhe manipulimin e provave, dy shokë të afërt të Markut dyshohet se mund ta kenë ndihmuar pas vrasjes së Ilarias. Dyshimet janë ngritur pas analizës së celulareve, ku është zbuluar se telefoni i viktimës është aktivizuar pas vdekjes dhe është lidhur me qeliza telefonike në afërsi të banesës së dy shokëve të Markut.

Kjo përforcon pistën se ata mund të kenë qenë në dijeni të krimit, ose madje edhe të kenë ndihmuar në zhdukjen e kufomës. Të dy të rinjtë janë marrë në pyetje nga hetuesit, por kanë mohuar çdo përfshirje në ngjarje. Megjithatë, policia vijon me hetimet dhe analizat teknike për të verifikuar lëvizjet dhe komunikimet e tyre.

Për më tepër, burime hetimore bëjnë të ditur se Mark Samson ka pasur vështirësi të mëdha për të treguar vendndodhjen e saktë të trupit, duke shtuar më shumë dyshime se ai mund të mos ketë qenë vetëm gjatë këtij veprimi të rëndë.

Ndërkohë, prokuroria po punon për të zbardhur të gjitha rrethanat e kësaj ngjarjeje që ka tronditur opinionin publik në Itali dhe më gjerë.