Një ngjarje e rëndë ka tronditur Borshin, ku një 26-vjeçar, pronar i një hoteli, u arrestua në flagrancë pasi kërcënoi me armë dy punonjëset e tij, nënë e bijë.

Sipas Policisë së Himarës, i riu E. Sh., gjatë një konflikti për motive të dobëta, i ka drejtuar një pistoletë 21-vjeçares dhe nënës së saj 53-vjeçare, të cilat punonin në hotelin që ai administronte. Falë ndërhyrjes së shpejtë të uniformave blu, u parandalua përshkallëzimi i situatës, që mund të kishte pasoja të rënda për jetën e punonjëseve.

Gjatë operacionit, policia sekuestroi armën e zjarrit, një krëhër dhe 8 fishekë, të fshehura në një valixhe. Për këtë arsye, u procedua penalisht edhe një 76-vjeçar, P. B., i cili dyshohet se i ka fshehur armën pas ngjarjes.

Po ashtu, në pranga ligjore u vendos edhe babai i autorit, A. Sh., 56 vjeç, i cili dyshohet se dhunoi fizikisht punonjësen e re përpara se djali i tij ta kanoste me armë.

Materialet i janë referuar Prokurorisë për hetime të mëtejshme, ndërsa policia vijon punën për sqarimin e plotë të ngjarjes.