Një grua nga fshati Tapizë i Krujës po hetohet për vrasjen e foshnjës që lindi në kushte shtëpie. Ngjarja e rëndë u shënua të hënën e 18 marsit, ndërsa sot vazhdojnë hetimet për zbardhjen e krimit horror.

42-vjeçarja Leta K., nënë e 5 fëmijëve, është nën hetim pasi policia gjeti trupin e pajetë të foshnjës, mbështjellë në një qese të zezë pranë një grumbulli mbeturinash, në shtratin e lumit Tapizë.

Leta K. pretendon se e ka lindur foshnjën në banesë pa shenja jete dhe e ka hedhur në lum, por kjo do të përcaktohet nga ekspertiza mjeko-ligjore. Bashkëshorti i saj nuk kishte dijeni për shtatzëninë, ndërsa vajza e tyre 22-vjeçe, e dyshuar për bashkëpunim, deklaron se nuk kishte dijeni për përmbajtjen e qesës.

Familja nuk kishte dijeni për shtatzëninë e Leta K., ndaj nuk kishte pasur ndjekje mjekësore gjatë kësaj periudhe. 42-vjeçarja, pas aktit të rëndë, është paraqitur në spital me dhimbje, ku ka treguar se lindja ka ndodhur në kushte të shtëpisë.

Hetimet vazhdojnë për të përcaktuar shkaqet e vdekjes së foshnjës dhe motivet që shtynë nënën drejt këtij akti ekstrem. Leta K. ndodhet në gjendje të rënduar psikologjike dhe shëndetësore në një maternitet të kryeqytetit, ku i është komunikuar akuzimi për “Vrasjen e Foshnjës”.