Autoriteti për Mbrojtjen e të Dhënave të Holandës (AP) ka paralajmëruar qytetarët që të mos përdorin chatbot-e si ChatGPT për të marrë rekomandime mbi votimin në zgjedhjet parlamentare që do të mbahen më 29 tetor.

Sipas një raporti të publikuar nga institucioni, testimet e kryera mbi katër chatbot-e të ndryshme treguan se këto sisteme shfaqnin prirje për të favorizuar dy parti politike specifike – një të ekstremit të djathtë (PVV) dhe një të majtë (GroenLinks-PvdA) – pavarësisht pyetjeve të bëra nga përdoruesit.

“Në më shumë se gjysmën e rasteve, chatbot-i sugjeronte një nga këto dy parti, edhe kur informacionet përputheshin më shumë me programet e partive të tjera”, thuhet në raport.
Ndërkohë, parti të tjera si CDA (qendër e djathtë) përmendeshin shumë rrallë, madje edhe në rastet kur pyetjet lidhen drejtpërdrejt me politikat e tyre.

Zëvendësdrejtoresha e AP, Monique Verdier, theksoi se chatbot-et, pavarësisht se duken si mjete inteligjente, nuk janë të besueshme për çështje politike apo zgjedhore.
“Votuesit mund të shtyhen të mbështesin një parti që nuk përputhet me bindjet e tyre reale politike. Kjo dëmton integritetin e zgjedhjeve të lira dhe të ndershme”, – deklaroi ajo.

Autoriteti shtoi se problemet nuk lidhen domosdoshmërisht me njëanshmëri të qëllimshme, por me mënyrën teknike se si modelet e inteligjencës artificiale përpunojnë informacionin dhe përfitojnë nga të dhënat e trajnimit.

Ky paralajmërim vjen në një periudhë kur teknologjitë e AI po përdoren gjithnjë e më shumë në fushata elektorale, duke ngritur shqetësime mbi manipulimin e opinionit publik dhe ndikimin në proceset demokratike.