Naveed Akram, 24 vjeç, doli për herë të parë para gjykatës të hënën, dy muaj pas sulmit me armë zjarri në Bondi Beach, që la 15 persona të vrarë dhe mbi 40 të plagosur.

I pandehuri u paraqit për rreth pesë minuta përmes lidhjes video nga burgu dhe përballet me 59 akuza, përfshirë 15 për vrasje dhe një për kryerje të një akti terrorist. Gjatë seancës, ai foli vetëm një herë, duke thënë “Po” kur u pyet nga zëvendës kryemagjistratja Sharon Freund nëse kishte dëgjuar diskutimin mbi zgjatjen e urdhrave të shtypjes.

Sipas autoriteteve, Naveed Akram dhe babai i tij, Sajid Akram, 50 vjeç, dyshohet se sulmuan një aktivitet të Hanukkah më 14 dhjetor në plazhin e njohur të Sidneit. Ngjarja konsiderohet si një nga sulmet më të rënda në Australi në afro 30 vjet.

Sajid Akram u qëllua për vdekje nga policia në vendngjarje, ndërsa i biri u plagos rëndë dhe më pas u transferua nga spitali në paraburgim.

Autoritetet konfirmuan se mes viktimave ndodheshin dy rabinë, një i mbijetuar i Holokaustit dhe një vajzë 10-vjeçare.

Sipas dokumenteve gjyqësore të publikuara në fund të dhjetorit, sulmi dyshohet se ishte planifikuar për muaj me radhë. Prokuroria pretendon se babë e bir kishin vizituar zonën për zbulim dy ditë para ngjarjes. Hetimet për motivet dhe rrethanat e plota të sulmit vijojnë.