Sipas një njoftimi zyrtar të Policisë, shtetasi Arian Malo, 54-vjeç, i cili ishte shpallur në kërkim ndërkombëtar për trafik droge dhe kishte një dënim prej mbi 5 vitesh burg nga drejtësia italiane, është arrestuar në Durrës. Operacioni është realizuar nga shërbimet e Drejtorisë Vendore të Policisë Durrës, në bashkëpunim me FAST Albania.

Shtetasi i arrestuar pritet të ekstradohet në Itali për të vuajtur dënimin e tij burgosje, pasi është gjetur fajtor nga autoritetet gjyqësore italiane për vepra penale në fushën e narkotikëve dhe krimeve ekonomike.

Njoftimi thotë se ky arrestim vjen si pjesë e aksioneve intensive të Policisë, të realizuara në kuadër të operacionit kombëtar “Sundimi i Ligjit”, i cili ka për qëllim kapjen e shtetasve të shpallur në kërkim ndërkombëtar ose kombëtar. Ky operacion është zhvilluar në bazë të informacioneve të siguruara nga inteligjenca policore dhe shkëmbimi i informacioneve ndërmjet Interpol Tiranë dhe Interpol Romë.