Merr fund misteri mbi fatin e biznesmenit italian Davide Pecorelli, makina e të cilit u gjet e djegur në Pukë.
Davide Pecorelli, i cili rezulton i zhdukur prej më shumë se 8 muajsh, rezulton të jetë gjallë.
Mediat italiane raportojnë se pas 8 muajsh kërkime babai i katër fëmijëve është gjetur i gjallë në një anije në brigjet e qytetit të Livornons në Itali.
Ky fakt është bërë i ditur nga gruaja e tij, e cila mësohet se ka folur me 45-vjeçarin në telefon.
Gazeta ‘La Nazione’ shkruan se Pecorelli u gjet dje, i gjallë dhe me shëndet të mirë, në rrethana ende të paqarta, në një gomone të mbytur pranë një ishulli, në bregdetin e Livornos. Pas gjetjes ai kontaktoi me gruan e tij në telefon.
Nuk kishte asnjë lajm për sipërmarrësin që nga fillimi i janarit të këtij viti, kur ai shkoi për biznes në Shqipëri. Makina që ai mori me qira në aeroportin e Tiranës, një Skoda Fabia, u gjet në flakë natën midis 7 dhe 8 janarit rreth 30 km nga Puka. Brenda mjetit të shkrumbuar u gjetën objektet e tij personale dhe disa eshtra, ekzaminimi i të cilave nuk kishte prodhuar rezultate të rëndësishme.
