Personi i dyshuar për plagosjen ndaj efektivit të Shqiponjave është Klered Bozhani, 42 vjeç.
Ai qëlloi ndaj Forcave Shqiponja në zonën e Porcelanit pasditen e sotme. Si pasojë mbeti i plagosur efektivi Edlir Alleshi.
Forcat Shqiponja pas njoftimit se në zonën e Porcelanit qarkullonte një person i armatosur, kanë shkuar në vend dhe janë vënë në ndjekje të tij. Ai i është kthyer duke qëlluar me armë dhe plumbat kapën efektivin Alleshi.
Kanë qenë shokët e tij që i kanë dhënë ndihmën e parë dhe më pas një ambulancë e ka marrë drejt Traumës, atje ku gjendet nën kujdesin e mjekëve, jashtë rrezikut për jetën.
Ndërsa, autori i plagosjes dyshohet se u largua nga vendngjarja me një makinë.
Njoftimi i Policisë:
Tiranë/Informacion shtesë
Shërbimet e Forcës së Posaçme “Shqiponja”, shërbimet e Forcës së Posaçme Operacionale, Patrullat e Përgjithshme të mbështetura nga Renea, po vijojnë ndjekjen dhe kontrollin e zonës, për kapjen e personit të armatosur, shtetasit Klerent Bozhanaj, 42 vjeç, që plagosi punonjësin e Policisë, inspektor E. A.
Policia e Shtetit kërkon bashkëpunimin e qytetarëve që kushdo që ndeshet të bëjë kujdes pasi ky shtetas është i armatosur, dhe të njoftojnë menjëherë shërbimet e Policisë.
DVP Tiranë fton qytetarët që të japin informacion për autorin e kësaj ngjarjeje dhe vendos shpërblim 20000 euro, për çdo informacion të vlefshëm që do të çojë në kapjen e autorit.
Drejtoria Vendore e Policisë Tiranë vendos në dispozicion të qytetarëve, numrin e telefonit 0694111546, duke garantuar anonimatin e plotë të çdo telefonuesi.
