Arbër Meçaj, 38 vjeç, është shqiptari që humbi jetën në një aksident tragjik gjatë një ndjekjeje policore në Itali. Ngjarja e rëndë ka ndodhur në zonën e Romës, ku Meçaj, i cili po transportonte kokainë me vlerë të përllogaritur rreth 1 milionë euro, tentoi t’i shpëtonte forcave të rendit.

Arratisja dhe përplasja fatale

Sipas mediave italiane, policia ishte vendosur në pritë pasi kishte informacion mbi aktivitetin kriminal të Meçajt dhe bashkëpunëtorit të tij italian. Sapo makina e tipit Fiat 500 L, pa targa, u afrua në rrugën Via Santa Maria Goretti, oficerët ndezën sirenat për ta ndaluar. Por në vend që të ndalonte, Meçaj nisi një arratisje me shpejtësi, që përfundoi tragjikisht në Via Spaventa.

Makina doli nga rruga dhe u përplas me një shtyllë, për t’u përmbysur menjëherë. Meçaj, që mbante me vete një çantë me 23 pako kokaine, vdiq në vend si pasojë e përplasjes. Hetimi paraprak tregon se ndjekja ka zgjatur rreth 30 minuta.

Hetimet në vazhdim

Trupi i viktimës është transferuar në Institutin e Mjekësisë Ligjore të Poliklinikës “Tor Vergata” ku do të kryhet autopsia, ndërkohë që autoritetet italiane po vijojnë hetimet për të zbardhur të plotë dinamikën e ndjekjes dhe origjinën e drogës së trafikuar.

Ky është një tjetër rast që trondit opinionin publik mbi përfshirjen e të rinjve shqiptarë në rrjetet ndërkombëtare të trafikut të drogës dhe pasojat tragjike që sjell krimi i organizuar.