Në Gjykatën e Posaçme Kundër Korrupsionit dhe Krimit të Organizuar (GJKKO) ka nisur sot seanca për vlerësimin e masave të sigurisë për Ilir Beqajn dhe bashkëpunëtorët e tij, të cilët po hetohen për korrupsion me fondet e BE-së në agjencinë SASPAC. Seanca u shty 30 minuta me kërkesë të avokatëve mbrojtës.

Sipas gazetarit Ervin Leka, Beqaj dhe avokatët e tij kanë kundërshtuar të gjitha akuzat dhe kanë kërkuar një masë më të butë sigurie me garanci pasurore, duke ofruar 5 milionë lekë të reja. Megjithatë, gjykata vendosi masën e sigurisë “arrest me burg” për Beqajn dhe bashkëpunëtorët e tij, Ermal Kurtulaj dhe Alfred Nikollën. Elton Marini dhe Gazmend Haxhia u vendosën në “arrest shtëpie”, ndërsa Bledar Leka dhe Bjona Zijaj, konsulentë financiarë, u vendosën në “detyrim paraqitjeje”.

Ish-ministri i Shëndetësisë, Ilir Beqaj, u arrestua mëngjesin e së enjtes. Sipas prokurorisë, gjatë kohës që ishte drejtor i agjencisë shtetërore të programeve strategjike (SASPAC), ai ngriti një skemë të mirëfilltë korruptive për të përfituar shuma parash nëpërmjet organizimit të tenderëve fiktivë. Në pranga u vunë edhe dy bashkëpunëtorët e tij, Ermal Kurtulaj dhe Alfred Naikolla.

SPAK ka ngritur disa akuza ndaj Beqajt dhe personave të tjerë, përfshirë korrupsionin, fshehjen ose mosdeklarimin e pasurisë, shkeljen e barazisë në tendera dhe mashtrimin. Beqaj akuzohet se ka organizuar të paktën tetë tendera për shërbime në kuadër të dy eventeve të organizuara në vitin 2023, të cilat nuk i janë nënshtruar një procedure të rregullt prokurimi. Fituesi i tenderëve ishte dakordësuar dhe përcaktuar shumë më parë se të realizohej procedura e prokurimit, e cila u krye në mënyrë fiktive për efekt dokumentacioni dhe pagese.