Presidenti i Partisë së Lirisë, Ilir Meta, reagoi sot në lidhje me situatën e zjarreve në Shëngjin, duke akuzuar qeverinë për papërgjegjshmëri dhe korrupsion. Në një postim në rrjetet sociale, Meta shprehu shqetësimin e tij për mënyrën si qeveria po përballet me zjarret, të cilat kanë shpërthyer në kulmin e sezonit turistik.

“Shëngjini në tym dhe flakë nga papërgjegjshmëria dhe korrupsioni kriminal i Edi Ramës, që në kulmin e sezonit turistik e ka mendjen vetëm si të vjedhë zgjedhjet në Bashkinë e Himarës,” shkroi Meta, duke ndarë pamje nga situata në terren.

Detajet nga Ministria e Mbrojtjes për Zjarrin në Shëngjin

Ministria e Mbrojtjes ka dhënë detaje mbi situatën e zjarrit që ka prekur zonën e Shëngjinit. Përveç forcave zjarrfikëse të pushtetit vendor, për shuarjen e flakëve është angazhuar edhe helikopteri Cougar i Forcave të Armatosura, 40 mjete zjarrfikëse dhe 150 forca në terren. Ministria e Mbrojtjes ka marrë masa për evakuimin e banorëve, duke shmangur kështu rrezikun për jetët e tyre.

Pas kërkesës drejtuar Mekanizmit Evropian të Mbrojtjes Civile, pritet të mbërrijnë shumë shpejt dy avionë Canadair për ndërhyrje nga ajri, që do të ndihmojnë në përballimin e situatës dhe shuarjen e flakëve.