Kreu i Partisë së Lirisë, Ilir Meta, ka bërë një thirrje publike për votën e shqiptarëve nga qelia, ku ndodhet prej disa muajsh. Në një postim në Facebook, ai ka prezantuar programin ekonomik të opozitës, i cili ka në fokus uljen e taksave dhe lehtësimin e barrës fiskale për qytetarët dhe bizneset.

“Më 11 Maj të heqim Ramën, që të ‘heqim’ taksat!”, shkruan Meta, duke e konsideruar Edi Ramën si “kryetaksa dhe kryegjobën më grabitqare për shqiptarët”.

Sipas tij, programi ekonomik “Made in Albania” i Shqipërisë Madhështore synon të:
• Ulet ndjeshëm kostoja e jetesës,
• Rriten të ardhurat e familjeve shqiptare,
• Nxisë punësimin e mirëpaguar,
• Transformojë Shqipërinë në një fuqi prodhuese dhe eksportuese në rajon.

Meta prezantoi një sërë masash fiskale, përfshirë:
Taksa e sheshtë 10% mbi të ardhurat dhe kapitalin,
Zero taksa për biznesin e vogël dhe profesionet e lira,
Uljen e TVSH-së në 15%,
Ulje drastike e taksës së pronës dhe energjisë elektrike për biznesin,
Heqja e taksës së karburantit,
Lehtësira për të rinjtë dhe gratë sipërmarrëse,
Përjashtim nga taksat për investitorët e huaj dhe shqiptarët që investojnë në vend,
Mbrojtje nga lëkundjet e kursit të euros.

Në fund, Meta u bëri thirrje qytetarëve që në zgjedhjet e 11 majit të votojnë Koalicionin “PD-Aleanca për Shqipërinë Madhështore” me numrin 1, dhe për të në Qarkun Tiranë.