Ish-presidenti Ilir Meta ka dhënë një intervistë për një emision televiziv, ku ka komentuar situatën e tij pas arrestimit dhe ka shpërthyer me akuza ndaj kryeministrit Edi Rama dhe ish-bashkëshortes së tij, Monika Kryemadhi. Meta, i cili ndodhet prej më shumë se dy javësh në qeli, e lidhi arrestimin e tij me të ardhmen e Partisë së Lirisë (PL), duke e parë këtë si një veprim për të favorizuar Kryemadhin në pozitat udhëheqëse të partisë.

Ai e konsideroi arrestimin e tij si një akt të planifikuar dhe të motivuar nga interesa politike, duke theksuar se ky ishte një përpjekje për të shmangur çdo ndikim të tij në politikën e vendit. “Arrestohet Ilir Meta në mënyrë kriminale që të mos kemi vetëm në krye të SPAK një Duman, por edhe në krye të Partisë së Lirisë një Krye Dumane,” tha Meta në intervistën e tij, duke iu referuar kështu Monika Kryemadhit me një epithet të ashpër. Ai e quajti Kryemadhin “KryeDumane”, duke e cilësuar atë si një figurë që po e merr drejtimin e partisë në një kohë kur ai është i ndaluar.

Meta shtoi se arrestimi i tij ka një lidhje të drejtpërdrejtë me përpjekjen për të minimizuar ndikimin e tij si një kundërshtar të fortë të Edi Ramës dhe një figurë që mbështet vlerat e pastrimit të politikës nga korrupsioni. Ai e mbrojti veten duke theksuar se është një kundërshtar i pa korruptueshëm dhe i pashantazhueshëm nga mafia ndërkombëtare dhe nga qeveria e Ramës. “Unë jam në qeli për të vetmen arsye se jam një kundërshtar i pashantazhueshëm dhe i pa korruptueshëm,” tha Meta.

Në fund, ai shprehu një lloj talljeje ndaj ëndrrave të atyre që e kanë arrestuar, duke thënë “Fali o Zot për ëndrrat e tyre”, duke sugjeruar se arritjet dhe ambiciet e atyre që janë kundër tij do të dështojnë.