Drejtori i Burgut të Rrogozhinës, Bilal Hasa, është lënë i lirë, ndërsa hetimet për operacionin “Kurtaj” do të vijojnë në gjendje të lirë ndaj tij.

Nga hetimet paraprake, dyshohet se Hasa nuk ka lidhje me dy magazinat e kanabisit të zbuluara në Peqin. Ndërkohë, në kërkim është shpallur vëllai i tij, si një nga personat e dyshuar në këtë çështje.

Hasa, i cili u vetëdorëzua një ditë më parë në polici, ka mohuar çdo përfshirje në veprimtarinë e paligjshme, duke deklaruar se prej muajsh nuk kishte shkuar në objekt dhe nuk kishte dijeni për aktivitetin që zhvillohej aty.

Gjatë kontrolleve, policia zbuloi në bodrumin e një magazine dy ambiente të përshtatura për kultivimin e kanabisit me llamba, ku ishin mbjellë rreth 4000 bimë. Po ashtu, u sekuestruan pajisje elektrike si llamba dhe neonë, që dyshohet se përdoreshin për këtë aktivitet.

Sipas policisë, objekti rezulton në pronësi të Hasës, çka çoi fillimisht në shpalljen e tij në kërkim. Në kuadër të operacionit është shpallur në kërkim edhe një tjetër shtetas me iniciale E.M., me detyrë përgjegjës i OSHEE-së në zonën e Peqinit, për veprën penale “Shpërdorimi i detyrës”.

Operacioni “Kurtaj” vijon nën drejtimin e Prokurorisë së Elbasanit, ndërsa hetuesit po punojnë për të zbardhur plotësisht skemën dhe për të identifikuar të gjithë personat e përfshirë.