Ilir Pere, një 48-vjeçar nga Gramshi i shumëkërkuar nga drejtësia italiane, është ndaluar në Belgjikë. Pere kishte marrë identitetin e rremë të një burri grek nga Peleponezi, me emrin Nikolaos Liarakos. Me këtë identitet fals, ai trafikonte drogë dhe shiste armë në vende të ndryshme të botës.

Në bashkëpunim me policinë belge, hetuesit italianë e lokalizuan atë në Liege, ku ai po mbahet tashmë i ndaluar. Prokurori i Catanzaros, Vincenzo Capomolla, deputeti Giancarlo Novelli, dhe prokurorja antimafia Stefania Paparazzo udhëtuan për në Belgjikë për ta marrë në pyetje.

Ilir Pere është dënuar me 28 vite burg dhe është në hetim në kuadër të operacionit ‘Gentleman 2’, që rindërton sfondin e një trafiku droge të ngritur mes Sibartide dhe Gjermanisë. Para magjistratëve italianë, Pere pranoi identitetin e tij të vërtetë dhe deklaroi se kishte përdorur identitetin grek për të kryer aktivitetet e tij kriminale.

Ai gjithashtu pranoi se kishte përdorur platformën Sky-Ecc për komunikime me miqtë e tij kalabrezë, aktivë në zonën e Cassanos, por mohoi të kishte një rol të rëndësishëm në trafikun e drogës. Pere pretendoi se kishte blerë armë të fuqishme për të marrë hak për vdekjen e vëllait të tij, i cili dyshohet se ishte vrarë dhe djegur nga shqiptarë të tjerë.

Sa i përket telefonave dhe celularëve të koduar, Pere shpjegoi se këto pajisje mund të bliheshin nga furnizues turq dhe pakistanezë, por vetëm nëse rekomandoheshin nga njerëzit e duhur. Ai preferoi të fliste me prokurorët italianë në italisht dhe jo në shqip, duke hequr dorë nga nevoja për një përkthyes.