Deputetja e Partisë Demokratike, Ina Zhupa, ka reaguar ashpër nga Konferenca e Kryetarëve, duke akuzuar mazhorancën për shkelje të rënda të parimeve të parlamentarizmit dhe të rregullores së Kuvendit, në lidhje me mënyrën e trajtimit të mandatit të deputetes Belinda Balluku.

Zhupa deklaroi se Kuvendi i Shqipërisë nuk mund të trajtohet si një institucion formal pa përmbajtje, duke theksuar se mazhoranca, sipas saj, po e zhvesh procesin ligjvënës nga thelbi i tij demokratik.

“Po e ktheni procesin ligjvënës në një formalitet, pa debat real dhe pa informimin e qytetarëve,” u shpreh deputetja e PD-së.

Ajo kritikoi mënyrën e miratimit të ligjeve, duke theksuar se projektligje me ndikim të drejtpërdrejtë në jetën e qytetarëve po kalojnë në seanca me rend dite të paqarta dhe të mbingarkuara. Sipas Zhupës, është e papranueshme që ligje të rëndësishme të miratohen në orët e para të mëngjesit.

“Në orën 3 të mëngjesit qytetarët as nuk mund të ndjekin dhe as të informohen për ligjet që i prekin drejtpërdrejt,” theksoi ajo.

Deputetja e PD-së e cilësoi këtë mënyrë funksionimi si një shkelje të rëndë të parimeve të transparencës, debatit dhe përfaqësimit demokratik, duke paralajmëruar se po dëmtohet seriozisht besimi i publikut te Kuvendi dhe institucionet shtetërore.

Gjithashtu, Zhupa akuzoi mazhorancën për shkelje sistematike të të drejtave të opozitës, duke përmendur mosvënien në votim të komisionit hetimor për fondet IPARD, mungesën e garancive për funksionimin e komisioneve të reformës zgjedhore dhe territoriale, si dhe moszbatimin e rregullores së Kuvendit lidhur me mandatin e deputetes Belinda Balluku.