Deputetja e Partisë Demokratike, Ina Zhupa, ka folur në Kuvend lidhur me përjashtimin e deputetëve të opozitës dhe ka akuzuar mazhorancën se ka shkelur Kushtetutën dhe rregulloren e Kuvendit. Ajo theksoi se largimi i opozitës nga Kuvendi kishte si qëllim të mundësonte miratimin e shpejtë të ligjeve nga mazhoranca, duke e kthyer parlamentin në një “seksion” të Partisë Socialiste.

Zhupa i bëri thirrje Kryetares së Kuvendit, Elisa Spiropali, të japë dorëheqjen, duke shtuar se mazhoranca po përdorte gardën dhe policinë për të penguar opozitën të merrte pjesë në seancat parlamentare. Ajo akuzoi mazhorancën se përjashtoi 24 deputetë të opozitës, dhe e quajti këtë një veprim të motivuar nga dëshira e qejfit të Spiropalit dhe urdhërat politikë të Edi Ramës.

“Përjashtuat 24 deputetë të opozitës se ju donte qejfi, apo se ju dha urdhër politik Edi Rama. Duhet të mbani përgjegjësi dhe të largoheni, hapni rrugën për një qeveri teknike, ku të gjithë të kenë rregulla të barabarta loje,” tha Zhupa, duke kërkuar largimin e qeverisë dhe të gjithë atyre që, sipas saj, e mbajnë parlamentin nën kontroll dhe në shkelje të ligjit.

Deputetja theksoi gjithashtu se mazhoranca mban në komisione figura të diskutueshme, si Plarent Ndreca, i cili është i pandehur nga SPAK. Ajo kërkoi që të largohen së bashku me qeverinë e tyre, duke theksuar se ky është një hap i nevojshëm për të kthyer Kuvendin në një vend të drejtë dhe të ligjshëm për debat.