Nënkryetarja e Partisë Demokratike, Jorida Tabaku, ka folur për inceneratorët dhe komisionin hetimor që është ngritur për të.
Tabaku u shpreh se zyrtarët shtetërorë përmes dëshmive të dhëna pranuan korrupsionin qeveritar me firmën e kryeministrit Rama, ndërkohë që ky i fundit u mbrojt politikisht në lidhje me aferën.
“Nesër përfundon hetimi, por ajo që nxori ky hetim është që tregoi se si korrupsioni qeveritar me firmën dhe vulën e Edi Ramës, u mbrojt politikisht nga Edi Rama por u pranua nga çdo zyrtar tjetër.
Ish-ministri i Financave tregoi përgjegjësitë që Ministria e Financave ka për miratimin e financave, kryetari i bashkisë Tiranë tregoi që nuk ka një vendim të Këshillit Bashkiak, po ashtu dhe krybashkiaku Subashi pranoi shkeljet e bashkisë Fier.
Këtu bëhet fjalë për korrupsionin më të madh qeveritar të këtyre 30-viteve 430 milionë euro.
Qeveria shqiptare paguan çdo ditë, qytetarët paguajnë, buxheti i shtetit gjendet më i varfër dhe i vjedhur. I bëj thirrje institucioneve që nuk kanë kthyer përgjigje, vazhdoj me Bashkinë Tiranë që të kthejnë të dhëna për procedurës. Sekretari i përgjithshëm i kryeministrisë premtoi të sjell procesverbalet e mbledhjeve kur janë diskutuar vendimet për inceneratorët.
Presim nga Nano që të sjellë lëvizjen e të gjithë personave që ne kemi kërkuar. Unë besoj se informacioni ka qenë publik i udhëtimeve të këtyre të fundit. Ne kemi dhe pak ditë për të bërë raportin.
Kryebashkiaku i Tiranës tha se nuk ka një vendim të këshillit bashkiak. Tre kompanitë dhe përfaqësuesit e tyre nuk dinin të shpjegonin se ku shkuan paratë. Paratë e shqiptarëve kanë shkuar në parajsa fiskale. Kemi tre inceneratatorë në letër dhe askush nuk kryen punën”, tha Tabaku.