Një incident i pazakontë dhe shqetësues ka ndodhur në aeroportin “Gatwick” të Londrës, ku një avion i British Airways me 334 pasagjerë në bord dhe 13 anëtarë ekuipazhi u detyrua të ndërpresë ngritjen në momentet e fundit, pas një gabimi njerëzor të pilotit të dytë.

Sipas raportit të Agjencisë së Hetimeve të Aksidenteve Ajrore (AAIB), piloti i dytë i Boeing 777 gabimisht manovroi levat e shtytjes në drejtim të kundërt, duke ulur fuqinë e motorëve në një moment kritik, pikërisht kur kapiteni kishte dhënë komandën për ngritje. Shkaku? Ai ngatërroi dorën e majtë me të djathtën.

Megjithëse për një çast shpejtësia iu rikthye avionit, procesi i ngritjes u anulua dhe mjeti u ndal pak metra para fundit të pistës, duke shmangur për pak një katastrofë të mundshme. Gjatë frenimit emergjent, frenat e avionit morën flakë, çka solli ndërhyrjen e menjëhershme të zjarrfikësve dhe mbylljen e pistës për 50 minuta, duke shkaktuar anulimin e 23 fluturimeve të tjera.

Fatmirësisht, nuk pati asnjë të lënduar, por incidenti ka ngritur shqetësime serioze mbi procedurat dhe monitorimin e ekuipazheve. AAIB konfirmoi se nuk kishte ndonjë faktor të jashtëm që të sugjeronte lodhje apo shpërqendrim të pilotëve – mëngjesi ishte i zakonshëm dhe ngarkesa e punës normale.

Ky rast vjen si një kujtesë alarmante se edhe një ngatërresë bazike në kabinë mund të rrezikojë jetën e qindra personave dhe nxjerr në pah nevojën për standarde më rigoroze në trajnimin dhe kontrollin e performancës së ekuipazhit.