Një ngjarje e paprecedentë është regjistruar sot në ambientet e Gjykatës së Shkallës së Parë në Vlorë, ku një punonjës sigurie është dhunuar nga një avokat.
Sipas burimeve zyrtare, përplasja ka ndodhur në hyrje të gjykatës, në zonën e kontrollit me detektor metalesh. Avokati Redi Llanaj mësohet se ka tentuar të kalojë pa respektuar procedurën e sigurisë, duke hyrë në zonën e ndaluar për personelin. Pasi punonjësi i sigurisë e ka penguar, debati verbal është përshkallëzuar në dhunë fizike.
Pas incidentit, avokati është shoqëruar menjëherë nga policia për të dhënë shpjegime mbi ngjarjen, ndërsa punonjësi i sigurisë ka marrë ndihmën e parë mjekësore.
Ngjarja ka shkaktuar reagime të forta në ambientet e gjykatës, ku kërkohet hetim i plotë dhe marrje e masave ndaj çdo akti që cënon rendin dhe integritetin e punonjësve të sistemit të drejtësisë.
