Komuniteti Mysliman i Shqipërisë reagon pas incidentit të rëndë të ndodhur këtë mëngjes, gjatë faljes së Fiter Bajramit, në Sheshin “Skënderbej”.

Ku një person ka hyrë mes besimtarëve dhe ka tentuar të vetëdigjet duke bërtitur se “nuk ka Zot”. Ai është ndaluar nga besimtarët dhe nuk është lejuar që të ndërmarrë veprimin ekstrem, ndërsa më pas është shoqëruar nga policia e rendit.

Një prej përfaqësuesve të KMSH e cilëson këtë incident sporadik dhe që nuk ka të bëjë me besimin.Duke theksuar se ai nuk është një prej besimtarëve, ndërsa aktin ekstrem tentoi ta merrte nën kushte të renda psikike.

“Sot është ditë feste, ditë gëzimi dhe ngjarje të tilla nuk i shërbejnë mesazheve të kësaj feste. Një situatë e tillë duket që ka ardhur për shkak të problemeve mendore të një personi apo kushteve në të cilat ai ndodhet. Nuk mund të mendohet që një besimtar të ndërmarrë një hap të tillë sidomos në një ditë kaq të rëndësishme të Fiter Bajramit. Në këtë ditë njerëzit gëzohen, lumturohen dhe të gjithë besimtarët vijnë për të treguar falenderimin ndaj Zotit. Incidente të tilla nuk kanë të bëjnë aspak me një besimtar me një mendje të shëndoshë”, ka thënë ai.