Një ekip studiuesish nga dy universitete në Letoni ka zhvilluar një pajisje revolucionare për diagnostikimin e melanomës dhe kancerëve të tjerë të lëkurës në faza të hershme. Pajisja, e quajtur “Bdetect,” përdor një metodë jo-invazive përmes fotografisë tre-ngjyrëshe, duke analizuar morfologjinë e lëkurës për të identifikuar ndryshime të dyshimta që mund të nënkuptojnë melanoma, kancer, ose masa beninje.

Kjo teknologji, me një saktësi të diagnostikimit prej 97%, është veçanërisht e dobishme për mjekët e familjes dhe pritet të përdoret gjerësisht jo vetëm në ambientet mjekësore, por edhe në qendrat estetike dhe në shtëpi. Drejtuesi shkencor i projektit, Aleksejs Lihacovs, shpjegoi për DW se pajisja është një arritje që vjen pas një dekade kërkimesh dhe bashkëpunimesh ndërmjet Universitetit të Letonisë dhe Universitetit Teknik të Rigës.

Projekti nisi zyrtarisht në vitin 2017 me financim nga Fondi Europian për Zhvillimin Rajonal. Pas sukseseve të para, ku prototipi i pajisjes identifikoi dy raste me melanoma të hershme, studiuesit kanë punuar për të përsosur pajisjen dhe për ta sjellë në treg.

Sfida kryesore tani mbetet certifikimi, i cili është një hap jetik për të garantuar përhapjen e “Bdetect” në tregje ndërkombëtare, duke synuar veçanërisht vendet ku kanceri i lëkurës është i përhapur për shkak të ekspozimit të lartë ndaj diellit apo klimës. Kjo risi letoniane është tashmë në garë në konkursin “Regio Stars 2024” në Bruksel, ku u përzgjodh ndër 25 finalistët për idetë më të mira inovative të BE-së.