Ministri i Jashtëm i Iranit, Seyed Abbas Araghchi, ka dënuar fuqishëm sulmet ajrore të ndërmarra nga SHBA ndaj objekteve bërthamore iraniane, duke i cilësuar ato si “të shëmtuara, të paligjshme dhe kriminale”.

Në një reagim zyrtar të shpërndarë në rrjetin social X, Araghchi theksoi se “ngjarjet e këtij mëngjesi janë të tmerrshme dhe do të kenë pasoja të përjetshme”, duke paralajmëruar se Republika Islamike rezervon “të gjitha opsionet për të mbrojtur sovranitetin e saj”.

Diplomati i lartë iranian u shpreh se sulmet përbëjnë “një shkelje të rëndë të Kartës së Kombeve të Bashkuara” dhe një akt flagrant nga një shtet anëtar i Këshillit të Sigurimit, duke ngritur alarmin për atë që ai e cilësoi si “sjellje jashtëzakonisht të rrezikshme” nga ana e SHBA-së.

Deklarata vjen në një klimë gjithnjë e më të tensionuar mes Uashingtonit dhe Teheranit, vetëm pak orë pasi presidenti amerikan Donald Trump konfirmoi bombardimet ndaj tri objekteve kyçe të programit bërthamor iranian.

Tashmë pritet përgjigjja e mëtejshme e qeverisë iraniane dhe hapat që mund të pasojnë në një rajon që tashmë është në prag të një përshkallëzimi serioz. Reagimet ndërkombëtare po shtohen, ndërsa frika për një konflikt të gjerë në Lindjen e Mesme rritet ndjeshëm.