Ish-deputetja socialiste, Esmeralda Shkjau, e cila prej tetë vitesh jeton dhe punon në Dubai në fushën e teknologjisë, ka folur për situatën e krijuar pas sulmeve të Iranit mbi Emiratet e Bashkuara Arabe, që sipas të dhënave zyrtare kanë shkaktuar 68 të plagosur dhe 3 viktima.

Në një intervistë për Top Channel, Shkjau përshkroi 48 orët e fundit si emocionalisht të vështira për banorët, por theksoi se jeta në qytet vijon në normalitet relativ.

“Fëmijët nuk kanë mundësi të shkojnë në shkollë, po zhvillojnë mësimin në distancë. Të gjitha qendrat tregtare, restorantet, korrierët – çdo gjë është normale. Ka pasur shumë goditje të përqendruara më së shumti në Emiratet e Bashkuara. Nga ana emocionale, natyrisht që jemi ndikuar. Nuk është e lehtë t’i shpjegosh fëmijës tënd çfarë po ndodh,” u shpreh ajo.

Sipas saj, banorët kanë dëgjuar shpërthime të forta, por dëmet nuk kanë prekur zonat rezidenciale. “Kemi parë fragmente të interceptimit ose neutralizimit të raketave, si re të vogla në qiell, por kaq,” tha Shkjau.

Autoritetet e Emirateve kanë njoftuar se deri më tani janë neutralizuar 148 dronë, 9 raketa balistike dhe 6 raketa cruise të telekomanduara. Sipas Shkjaut, ka pasur komunikime të vazhdueshme nga zyrtarët e lartë, përfshirë ministren Rimel Hashimi, ku është theksuar nevoja për ulje të tensioneve si prioritet kryesor.

Sa i përket transportit ajror, ajo bëri të ditur se kanë rifilluar 80 fluturime, ndërsa mbi 27 mijë udhëtarë janë në proces imbarkimi.

“Shpresoj që muaji i bekuar i Ramazanit të sjellë paqe dhe pjekuri, sepse kur humbasim qetësinë dhe na kap paniku, bëjmë edhe lëvizje të gabuara,” përfundoi ajo.