Ish-futbollisti i njohur i kombëtares turke dhe Fenerbahces, Serhat Akin, ka përjetuar një incident të tmerrshëm në Turqi, ku është plagosur me armë zjarri. Ngjarja ndodhi sapo 43-vjeçari doli nga një emision sportiv dhe i drejtohej automjetit të tij. Papritur, një person i armatosur dhe i maskuar zbriti nga një motor dhe filloi të qëllojë drejt tij. Një nga plumbat e ka goditur Akinin në këmbën e djathtë, por për fat të mirë, atentatori arriti të largohej nga vendi i ngjarjes.

Pas incidentit, Akin reagoi përmes një postimi në rrjetet sociale, ku njoftoi se kishte marrë plumb në këmbë. “Më gjuajtën në këmbë pas programit, fjala jonë e fundit është Fenerbahçe,” tha ai, duke shprehur dashurinë e tij për klubin.

Aktualisht, gjendja e ish-futbollistit është e qëndrueshme dhe ai ndodhet në spital, ku po merr ndihmën e nevojshme mjekësore. Autoritetet janë duke hetuar për ngjarjen, në përpjekje për të identifikuar dhe kapur autorin e sulmit.