Sali Berisha, ish-kryeministri dhe kryetari aktual i Partisë Demokratike, feston sot 80-vjetorin e lindjes në një situatë aspak të zakontë, pasi ndodhet në arrest shtëpiak që prej 30 Dhjetorit të vitit të kaluar. Kjo masë është vendosur dhe lënë në fuqi nga dy shkallët e Gjykatës së Posaçme Kundër Korrupsionit dhe Krimit të Organizuar (GJKKO) dhe Gjykata e Lartë, me kërkesë të SPAK, në lidhje me dosjen “Partizani”. Berisha përballet me akuzën e “korrupsionit pasiv”, ndërsa dhëndri i tij, Jamarbër Malltezi, ndodhet gjithashtu në arrest shtëpiak për të njëjtën çështje, me akuzën shtesë të pastrimit të parave.

Sipas procedurës së Kodit Penal, Berisha nuk mund të pranojë vizita pa lejen e SPAK dhe GJKKO, duke qenë i kufizuar në festimin e kësaj ditëlindjeje.

I lindur më 15 Tetor 1944, në fshatin Viçidol të Tropojës, Berisha fillimisht ishte një kardiolog i njohur, por e la profesionin më 1991 për t’u angazhuar në politikë. Ai ka shërbyer si presidenti i dytë i Shqipërisë nga 1992 deri në 1997 dhe më pas si kryeministër në periudhën 2005–2013. Ndërkohë, drejtimi i tij është i shoqëruar me disa nga ngjarjet më tragjike në historinë e vendit, si rënia e skemave piramidale dhe trazirat e vitit 1997, shpërthimi në Gërdec më 15 Mars 2008 me 26 viktima, dhe 21 Janari 2011, ku katër protestues u vranë nga Garda e Republikës gjatë një proteste në bulevard.