Një incident i pazakontë ndodhi mbrëmjen e djeshme në qytetin e Korçës, ku ish-portieri i njohur i futbollit shqiptar, Kostandin Dramolli, goditi me gurë xhamat e godinës së Bashkisë në shenjë proteste ndaj aksioneve për lirimin e hapësirave publike.
Ngjarja u transmetua drejtpërdrejt nga vetë 26-vjeçari në rrjetet sociale, ku dëgjohet të thotë: “Shiko si sulmohet bashkia”, ndërsa godiste me gurë ndërtesën. Sipas tij, veprimi erdhi pas prishjes së disa strukturave në lagjen nr. 14, ku ai jeton prej vitesh.
I njohur me nofkën “Çekiçi 14” pas tërheqjes nga futbolli, Dramolli është tashmë pjesë e skenës së muzikës rap. Në të kaluarën ka qenë pjesë e ekipeve si Skënderbeu, Bylis, Pogradeci, Maliqi dhe Pierikos në Greqi, duke u shpallur kampion me ekipin U-19 të Skënderbeut.
Policia e Korçës ndërhyri menjëherë dhe arrestoi të riun, ndërsa materialet u referuan në Prokurori.
Sipas njoftimit zyrtar të policisë:
“Specialistët për Hetimin e Krimeve në Komisariatin e Policisë Korçë referuan materialet në Prokurori, ku filloi procedimi penal për shtetasin K. D., 27 vjeç, banues në Korçë, pasi rreth orës 02:15 ka goditur me gurë xhamat e Bashkisë Korçë.”
Ngjarja ka ndezur debate në rrjetet sociale dhe ka rikthyer në vëmendje tensionet që shoqërojnë aksionet për lirimin e hapësirave publike. Pritet një reagim zyrtar nga Bashkia e Korçës për incidentin.
