Motra e Flutura Bashës, 56-vjeçares që u bë viktimë e pafajshme në atentatin mafioz ku humbën jetën edhe të rinjtë Hamza Lici dhe Arlind Bushati, ka përshkruar gjendjen e rënduar të kunatit të saj, Bashkim Basha. Sipas saj, ai ndodhet në intubim dhe vetëm një mrekulli mund ta shpëtojë.

“Fati i saj i keq. Ishte në vendin e gabuar në kohën e gabuar. Bashkimi është shumë keq. Nuk ka dalë ende nga gjendja kritike. Flutura la pas dy vajza dhe një djalë. Vetëm një mrekulli nga Zoti mund ta shpëtojë,” – tha ajo me dhimbje të thellë.

Atentati mafioz që tronditi Shkodrën ka lënë pasoja të rënda. Katër persona dyshohet se kanë planifikuar dhe kryer vrasjen e Hamza Licit, duke përfshirë në këtë ngjarje edhe jetën e pafajshme të Flutura Bashës, e cila po kthehej në shtëpi me të shoqin kur makina e tyre u përplas nga “Benzi” i Licit, që kishte humbur kontrollin.

Bashkim Basha mbetet në gjendje të rëndë, ndërsa policia ka nisur aksionin për kapjen e autorëve.