Pas dy dështimeve të njëpasnjëshme, pala italiane po tenton për herë të tretë dërgimin e emigrantëve të paligjshëm në kampin e Shëngjinit. Sipas medias italiane ANSA, rreth 49 emigrantë, të cilët besohet se vijnë nga Egjipti dhe Bangladeshi, ndodhen në bordin e anijes Cassiopea për t’u transferuar në Shqipëri. Emigrantët pritet të mbërrijnë në kampin e Shëngjinit mëngjesin e 27 janarit.

Procedurat e pritjes dhe vlerësimit të rasteve individuale do të nisin pas mbërritjes së tyre. Ndërkaq, 53 migrantë të tjerë kanë dorëzuar vullnetarisht pasaportat e tyre për të shmangur transferimin në Shqipëri, duke mundësuar përshpejtimin e procedurave të verifikimit të statusit të tyre dhe riatdhesimin e atyre që nuk kanë të drejtë qëndrimi në Bashkimin Evropian.

Rifillimi i operacioneve nxitet nga shtimi i zbarkimeve, me 1,264 mbërritje në gjashtë ditët e fundit. Anija “Cassiopea” po përdoret për transferimin e tretë të azilkërkuesve në Shqipëri, pas dy të parave në tetor dhe nëntor. Pas mbërritjes në Shëngjin, emigrantët do të kalojnë nëpër procedurat e identifikimit dhe do të qëndrojnë në kampet e ngritura për pritjen e vendimeve mbi kërkesat e tyre për azil.