Një valë e fuqishme të nxehti, e pagëzuar me emrin “Deve”, ka përfshirë Italinë jugore gjatë ditëve të fundit, duke shkaktuar rritje ekstreme të temperaturave dhe pasoja tragjike për jetën njerëzore. Deri tani janë konfirmuar gjashtë viktima si pasojë e goditjeve të nxehtësisë.

Sipas mediave ndërkombëtare, vetëm gjatë ditës së sotme janë raportuar dy vdekje të reja – një burrë 60-vjeçar dhe një tjetër 81-vjeçar – të cilët kanë ndërruar jetë nga arresti kardiak ndërsa ndodheshin në plazh.

Vala e të nxehtit ka qenë vdekjeprurëse edhe në ditët e mëparshme. Një turist austriak 19-vjeçar, dy burra të moshës 66 dhe 71 vjeç, si dhe një grua italiane 60-vjeçare kanë humbur jetën si pasojë e temperaturave ekstreme që në disa rajone kanë kaluar kufirin e 43 gradë Celsius.

Mjekët pohojnë se të gjitha rastet e vdekjes janë të lidhura drejtpërdrejt me ndikimin e valës së të nxehtit, veçanërisht te personat me probleme shëndetësore ose ata të ekspozuar për një kohë të gjatë në diell.

Meteorologët kanë bërë të ditur se vala pritet të fillojë të tërhiqet nga mbrëmja e së enjtes, por paralajmërojnë se në shumë zona të jugut temperaturat do të mbeten mbi mesataren sezonale.

Ndërkohë, autoritetet italiane vijojnë të monitorojnë nga afër situatën, ndërsa u bëjnë apel qytetarëve që të shmangin daljet në orët e pikut, të qëndrojnë të hidratuar dhe të kërkojnë ndihmë mjekësore nëse ndiejnë simptoma të lodhjes apo goditjes nga nxehtësia.