I vendosur për të përshkallëzuar situatën në Lindjen e Mesme, Izraeli duket se ka hartuar një plan për t’u hakmarrë kundër Hezbollahut pas sulmit me dron që synoi rezidencën e kryeministrit Benjamin Netanyahu. Pas goditjes, Netanyahu e përshkroi atë si një atentat ndaj tij dhe njoftoi një përgjigje të menjëhershme ndëshkuese ndaj aleatëve të Iranit.

“Aleatët e Iranit që u përpoqën të më vrisnin mua dhe gruan time sot bënë një gabim të rëndë. Kjo nuk do të më pengojë mua dhe Shtetin e Izraelit nga vazhdimi i luftës së drejtë kundër armiqve tanë për të siguruar të ardhmen tonë,” shkroi Netanyahu në një postim në X.

Sipas raportimeve nga mediat e huaja, Këshilli i Sigurimit të Izraelit do të mblidhet së shpejti për të diskutuar mbi përgjigjen ndaj Teheranit. Më herët, ministri i Mbrojtjes i vendit, Yoav Gallad, gjatë një konference për situatën në kufirin verior, tha: “Ne po punojmë për të kaluar në një fazë tjetër, të mposhtjes së armikut duke hedhur në erë tunele, depo municionesh, duke çmontuar Hezbollahun”.

“Po i afrohemi gjithnjë e më shumë përfundimit të misionit, edhe pse ka ende shumë për të bërë. Forcat e Mbrojtjes të Izraelit (IDF) po përgatiten për lëvizje të mëtejshme, por në radhë të parë duke e ekzekutuar këtë operacion si duhet,” shtoi Gallad.

Takimi i Këshillit të Sigurimit do të zhvillohet në bazën ushtarake të Tel Avivit, ndërsa Izraeli vazhdon të përgatitet për të goditur Iranin në përgjigje të sulmit me raketa balistike të Republikës Islamike më 1 tetor.