Rripi i Gazës – Pavarësisht thirrjeve ndërkombëtare për armëpushim, Izraeli ka kaluar në fazën tjetër të operacionit ushtarak në Rripin e Gazës, me synimin e pushtimit të plotë të territorit dhe çmontimit të Hamasit. Prej të enjtes, mbi 50 mijë rezervistë janë mobilizuar dhe lagjet periferike të qytetit të Gazës tashmë janë nën kontrollin e forcave izraelite, ndërsa ofensiva pritet të intensifikohet në ditët në vijim.

Hamas ka pranuar një plan të ri për armëpushim të ndërmjetësuar nga Katari, por Izraeli nuk ka dhënë ende një përgjigje zyrtare. Zyrtarët izraelitë njoftojnë për përpjekje për evakuimin e civilëve dhe shpërndarjen e ndihmave humanitare, duke bërë thirrje që stafi mjekësor dhe organizatat ndërkombëtare të zhvendosen në jug të Gazës.

Kryeministri Benjamin Netanyahu ka deklaruar se planet për marrjen e qytetit janë përshpejtuar, por mediat izraelite paralajmërojnë se operacioni mund të zgjasë deri në vitin 2026.

Në një konferencë ndërkombëtare në Japoni, Sekretari i Përgjithshëm i OKB-së, Antonio Guterres, përsëriti thirrjen për armëpushim të menjëhershëm. Ai paralajmëroi për rrezikun e vdekjes masive dhe shkatërrimit të plotë që mund të shkaktojë ofensiva dhe dënoi zgjerimin e vendbanimeve hebraike në Bregun Perëndimor, duke e konsideruar atë shkelje të ligjit ndërkombëtar.

Edhe Komiteti Ndërkombëtar i Kryqit të Kuq ka apeluar për përmbajtje, duke theksuar se zgjerimi i operacioneve mund të sjellë një krizë humanitare të pakthyeshme. Aktualisht, 80% e sipërfaqes së Gazës është përfshirë nga urdhrat për evakuim, duke e bërë të pamundur për civilët të gjejnë strehim.

Situata humanitare mbetet kritike: mungesë ushqimesh, uji i pijshëm dhe ndihmat mjekësore janë të pakta, ndërsa bota vazhdon të bëjë thirrje për ndalimin e gjakderdhjes.