Pas disa muajsh tensionesh dhe transferimesh të dyshimta, ish-shefi i Komisariatit nr. 2, Ritvan Pali, është larguar përfundimisht nga Policia e Shtetit. Burime nga institucioni tregojnë se shkaku kryesor nuk ishte performanca profesionale, por arrestimi i Altin Morinës, ish-efektiv i RENEA-s dhe i dyshuar për trafik droge, që kishte lidhje të afërta me eprorë të lartë.

Operacioni ndaj Morinës, i drejtuar nga Pali, u konsiderua nga shumë oficerë si veprim profesional dhe i guximshëm, por disa drejtues e panë si “gabim të pafalshëm”. Pas arrestimit, disa nga pjesëmarrësit në operacion u transferuan ose degraduan, duke përfshirë edhe vetë Palin, i cili përfundoi në Komisariatin e Leskovikut, një detyrë që u interpretua gjerësisht si ndëshkim i maskuar.

I lodhur nga trajtimi arbitrar dhe mungesa e mbështetjes institucionale, Pali dha dorëheqjen, duke lënë një sinjal shqetësues për sistemin: shpërblehet lidhja personale, jo profesionalizmi.

“Ky është një nga rastet më tipike ku ndëshkohet njeriu që zbaton ligjin dhe mbrohet ai që ka miq,” – thotë një burim brenda policisë.

Ngjarja ngre pyetjen: Në shërbim të kujt funksionon sot Policia e Shtetit – të ligjit apo të miqësive personale?