Me uljen e temperaturave në vjeshtë, është vënë re një rritje e rasteve të virozave dhe infeksioneve respiratore. Rreth 10 mijë raste në javë raportohen nga qendrat shëndetësore me simptoma të tilla si kollë, laringit dhe temperaturë e lartë.

Fëmijët e moshave shkollore janë më të prekurit nga këto viroza, por gjithashtu ka një numër në rritje të rasteve edhe tek fëmijët në kopshtet dhe çerdhet. Përveç virozave klasike të vjeshtës, edhe Covid-19 është ende në qarkullim. Sipas ekspertëve të Shëndetit Publik, Covid-19 nuk është më i lidhur me ndonjë stinë specifike, duke qarkulluar gjatë gjithë vitit. Pas një rritjeje të infeksioneve gjatë verës, numri i rasteve aktualisht ka rënë, megjithëse testimet për Covid-19 janë gjithashtu më të ulëta.

Nga ana tjetër, gripi sezonal ende nuk ka filluar të qarkullojë. Drejtuesit e Institutit të Shëndetit Publik rekomandojnë që tani është koha më e mirë për vaksinimin kundër gripit. Rreth 280 mijë doza vaksine janë shpërndarë në të gjitha qendrat shëndetësore të vendit, për të mbrojtur të moshuarit, të sëmurët kronikë dhe grupet e tjera të rrezikuara.