Presidenti i vendit Ilir Meta, ka mbajtur sot një konferencë për mediat, ku u pyet nëse do të lirojë zyrën në rast shkarkimi nga Gjykata Kushtetuese.

Presidenti u shpreh se ai po pret me padurim që të mbarojë mandatin e tij kushtetues në krye të presidencës, për tiu bashkuar popullit të 2 Marsit, që sipas tij është irrituar ndjeshëm me falsifikimet e fundit.

“Ju thoni që nëse është 24 Korriku sot, unë them që të ishte dje, nuk do të ketë asnjë bravë shtesë, në 24 Korrik do të bëjmë një festë të gjithë së bashku, dhe pastaj do shkojmë te populli i 2 Marsit që është irrituar shumë nga këto falsifikimet e fundit. Pjesë tjetër është dinamike, nuk varet nga presidenti. Ta harrojnë të gjithë ata që kanë menduar se në mënyrë mafioze, rilindas vendas dhe ndërkombëtar se do të varrosin pluralizmin politik në Shqipëri. Jam Ilir Meta o superbudallenj”, tha Meta.

Gjatë konferencës së sotme me gazetarët, Meta njoftoi se ai ka firmosur kallëzim penal ndaj zyrtarëve të Kuvendit, që kanë falsifikuar dokumentet, dhe i kanë dorëzuar në Gjykatën Kushtetuese si prova për shkarkimin e tij.