Aktorja e njohur Jennifer Garner ka shpërthyer në lot gjatë një interviste me gazetaren e MSNBC, Katy Tur, ku ka ndarë dhimbjen e saj për humbjen e një mikes dhe të shumicës së miqve të saj për shkak të zjarrit shkatërrues në Los Angeles. “Shoqja ime nuk ia doli me kohë. Jam e trishtuar për miqtë e mi. Pa menduar, mund të përmend njëqind prej tyre që humbën shtëpitë e tyre”, tha emocionuar Garner.

Në një moment të ngarkuar me emocione, aktorja foli gjithashtu për angazhimin e saj humanitar dhe mbështetjen që po ofron për zjarrfikësit që po luftojnë me flakët në Los Angeles. Ajo iu bashkua vullnetarizmit për të siguruar ushqim për zjarrfikësit, duke kontribuar në ndihmën për ata që janë përfshirë në luftën kundër zjarreve që po shkatërrojnë qytetin.

Garner është një ambasadore e njohur për “Save the Children” dhe ka qenë e angazhuar për 15 vjet në organizata jofitimprurëse që ndihmojnë në mbështetje të fëmijëve dhe komunitetit. Ajo dhe ish-bashkëshorti i saj, Ben Affleck, bashkuan forcat gjatë Ditës së Falënderimeve për të ushqyer 2000 njerëz të pastrehë në Los Angeles, duke ofruar ndihmë për ata që po përballen me vështirësi të mëdha për shkak të situatës së krijuar nga zjarret.

Në Los Angeles, më shumë se 100,000 njerëz janë evakuuar nga zonat e prekura ndërkohë që zjarret vazhdojnë të rriten për shkak të erërave të forta. Deri tani, janë shkatërruar rreth 30,000 hektarë tokë dhe mijëra ndërtesa kanë mbetur në gërmadha.