Presidenti amerikan Joe Biden është bërë sërish viral pas një tjetër serie gafash, të cilat po ndodhin me një frekuencë të shtuar. Ndërkohë që Biden është tërhequr nga përpjekja për të siguruar një mandat të dytë si president, stafetën e udhëheqjes së Partisë Demokrate ia ka kaluar zëvendëspresidentes Kamala Harris.

Vetëm pak orë përpara debatit televiziv mes kandidates demokrate dhe rivalit të saj republikan, Donald Trump, Biden rrëmbeu vëmendjen me një tjetër gafë. Duke folur në prag të përvjetorit të 23-të të sulmeve të 11 Shtatorit, një datë që përfaqëson një plagë të thellë në historinë amerikane, presidentit i rrëshqiti goja.

Teksa përshkruante planin e tij për të udhëtuar në Nju Jork për ditëlindjen e mbesës së tij, Biden tha:

“Po shkoj në ditëlindjen e mbesës sime në Nju Jork. Atje do të ndjekim debatin, e pastaj nesër do të bëj 11 shtatorin.” Komenti i tij ngjalli konfuzion, pasi ai kishte ndërmend të referohej pjesëmarrjes në ceremonitë përkujtimore për sulmet terroriste të 11 shtatorit 2001, një moment solemn dhe shumë i rëndësishëm për amerikanët.

Ky moment i Bidenit ka sjellë sërish në qendër të vëmendjes vështirësitë e tij me komunikimin, që kanë ngjallur shqetësim te disa qytetarë dhe komentatorë politikë.